Главная

Медициналық сақтандыру туралы түсіндіру жұмыстары жүргізілді

10.07.2022 08:28

Бүгін Талдықорған қалалық көпсалалы ауруханасында Алматы облысы Денсаулық сақтау басқармасының мамандары облыстағы медицина мекемелерінің басшылары мен жауапты мамандарына міндетті әлеуметтік медициналық сақтандыру және тегін медициналық көмектің кепілдендірілген көлемі туралы семинар өткізді.

МӘМС - Қазақстанның барлық сақтандырылған азаматтарына жынысына, жасына, әлеуметтік жағдайына, тұрғылықты жерiне және табысына қарамастан медициналық және дәрілік көмектің қолжетімді болуына кепілдік береді. Міндетті әлеуметтік медициналық сақтандыру  - ауру, жарақат алу, жүктілік, мүгедектік және кәрілік жағдайларында халық денсаулығының мүддесін әлеуметтік тұрғыда қорғау болып табылады.

Қазақстанда қолданыстағы заңнамаға сәйкес  2020 жылдан бастап жұмыс берушілер 5%, қызметкерлер  2% мөлшерінде төлейді.

Ал тегін медициналық көмек алғашқы медициналық-санитариялық көмек қызметкерінің жолдамасы бойынша көрсетіледі. 18 жасқа толмаған балаларға, жүкті әйелдер мен тісі ауырсынып келген науқастарға да стоматологиялық қызмет тегін көрсетіледі, бұған ортодонттық қызмет жатпайды. 18 жасқа толмаған балаларға физиотерапевтикалық қызмет тегін көрсетіледі. Сонымен қатар алғашқы медициналық-санитарлық қызмет маманының жолдамасы негізінде аурулардың барлық түрлері бойынша жоспарлы қызмет көрсету, оның ішінде:  онкологиялық, психоневрологиялық, инфекциялық,офтальмологиялық, хирургиялық, нейрохирургиялық, ортопедиялық, уронефрологиялық, терапевтикалық, травматологиялық, дерматологиялық және венерологиялық, жүкті әйелдер мен гинекологиялық аурулар, алкоголизм және наркомания, туберкулез, қант диабеті, бронх және өкпе аурулары, АИТВ жұқтырған науқастарға және төтенше жағдайлар нәтижесінде пайда болған ауруларға байланысты медициналық көмек көрсетіледі.